સેવ ખમણી … (અમીરી ખમણી) …

સેવ ખમણી … (અમીરી ખમણી) …

 

સેવ ખમણીની તસ્વીર નેટ જગતને આભારી છે.

 

 

તેહવારના દિવસો નજીક હોય, રજાનો માહોલ પણ તે સમયે ઘરમાં હોય, કોઈ એવી વાનગી બનાવી કે જે ખૂબજ સરળ હોય અને ખાવની પણ દરેક ને પસંદ આવે. સેવ ખમણી બનાવવી ખૂબજ સરળ છે. સેવ ખમણી – અમીરી ખમણી એ મૂળ તો સુરતી ચટાકાની વાનગી છે,પરંતુ હાલ અમદાવાદમાં દાસની સેવ ખમણી સુરતનું અંતર ભૂલાવી દે એવી હોય છે એટલે અમદાવાદમાં પણ સેવ ખમણી ઠીક ઠીક લોકપ્રિય થઈ છે. સેવ ખમણી ને અમીરી ખમણી તરીકે પણ ઓળખવામાં આવે છે, કારણ કે તેમાં તેલનું પ્રમાણ ઉપયોગમાં વધુ લેવાતું હોય છે. જે કારણે તે અમીરી ખમણી પણ કહેવાય છે.

સેવ ખમણી બનાવવાની રીત અનેક છે, પરંતુ માર્કેટ/ બજારમાં મળતી સેવ ખમણીની એક સર્વ સામન્ય પદ્ધતિ છે, હા, દરેક બનાવનાર ની હથરોટી પ્રમાણે સ્વાદ / ટેસ્ટ કદાચ અલગ અલગ પામવા મળે. તો ચાલો સેવ ખમણી બનાવવાની સર્વ સામન્ય રીત સાથે અન્ય રીત પણ આપણે આજે જાણીશું અને માણીશું.

રીત નં … ૧

સામગ્રી :

૧-૧/૪ કપ ચણા ની દાળ
૧/૨ કપ તેલ
૧ નાનો ટુકડો આદુ નો
૮-૧૦ નંગ લીલાં મરચાં (જીણા-તીખા)
૧/૪ કપ ખાંડ (૨ – ટે.સ્પૂન ખાંડ)
૧/૪ ટે.સ્પૂન હળદર પાઉડર
૨ ટે.સ્પૂન લીંબુ નો રસ (અથવા ૧ ટે.સ્પૂન લીંબુ ના ફૂલ /સાઈટ્રિક એસિડ)
૧ ટે.સ્પૂન રાઈ અથવા જીરૂ ( પસંદ હોય તે ઉપયોગમાં લઇ શકાય)
૧ પીંચ / ચપટી હિંગ (પસંદ હોય તો જ )
૧/૨ કપ લીલી કોથમીર જીણી સમારેલ
૧૫૦-૨૦૦ ગ્રામ જીણી (નાઈલોન) સેવ ( અથવા મીડીયમ સેવ)
૪-૬ નંગ મીઠા લીમડા ના પાન (કરી પત્તા)

 

રીત:

ચણાની દાળ ને અગાઉથી ૩-૪ કલાક માટે પાણીમાં પલાળીને રાખવી. ત્યારબાદ પાણીમાંથી બહાર કાઢી અને મિક્સરમાં કે વાટવાની પથ્થરની કૂંડીમાં પીસવી. ધ્યાન રહે કે સાવ લીસી / મુલાયમ પીસવાની નથી. પીસતી સમયે જરૂર લાગે તો થોડું પાણી ઉંમેરી શકાય છે.

આદુ – મરચાને પીસી અને તેની પેસ્ટ બનાવી અલગથી રાખી દેવા. તમને પસંદ હોય તો લસણની પણ પેસ્ટ બનાવી અલગ રાખી દેવી. ( ૬-૮ કળી લસણ લઇ અને તેને વાટી લેવું.)

એક નોન સ્ટિક કડાઈમાં તેલ ગરમ કરવા મૂકવું. તેમાં રાઈ / જીરૂ જે પસંદ હોય તે નાંખી અને તેને શકવી. (તતડાઈ જાય ત્યાં સુધી) અને શેકાઈ જાય કે તૂરત તેમાં હિંગ નાખવી ૨-૩ સેકન્ડ રાખી મિક્સ કરવું. કરી પત્તા નાંખવા. ત્યારબાદ પીસેલી ચણાની દાળ તેમાં ઉમેરવી અને તેને પાકવા દેવી. જો દાળ વધુ પડતી સૂકી/ ડ્રાઈ થઇ જતી હોય તેવું લાગે તો થોડું થોડું પાણી ઉમેરવું / નાખવું અને તેને પાકવા દેવી. (કોઈ કોઈ લોકો પાણી ને બદલે દૂધનો ઉપયોગ પણ કરતાં હોય છે, ૩-૪ ચમચી દૂધ ૨-૩ વખત થોડા થોડા અંતરે ઉપયોગમાં લઇ શકાય. (લગભગ ૧/૨ કપ જેટલું દૂધ ) ) દાળ પાકી જશે એટલે તેલ છૂટું પડશે. (સામન્ય તેલ,) દાળ કડાઈને ચોંટશે નહિ, કિનારીથી અલગ પડી જશે. ત્યારબાદ, આદુ, મરચાં અને લસણ ની પેસ્ટ ઉમેરવી અને ૩-૪ મિનિટ માટે હલાવતાં રેહવું અને શેકવી.

ત્યારબાદ ખાંડ નાખવી અને પાંચ મિનિટ માટે મિક્સ કરી સતત હલાવવું.ત્યારબાદ મીઠું પ્રમાણસર ઉમેરવું અને લીબુનો રસ નાંખી અને મિક્સ કરવો. અને ૩-૫ મિનિટ અંદાજે શેકવી અને તાપ બંધ કરી દેવો અને કડાઈ ગેસ પરથી નીચે ઉતારી લેવી. લીલી સમારેલી કોથમીર છાંટવી. અને ગરમા ગરમ ખમણી ઉપર સર્વ કરો ત્યારે ન્ઝીલોન સેવ ને છાંટવી. અને સર્વ કરવી.

 

સુજાવ :

૧] રાઈ –જીરૂ ને સાંતળી લીધાં બાદ, આદુ. લસણ અને મરચાની પેસ્ટ નાંખી શકાય છે અને તે સાંતળી લીધાં બાદ, દાળ ને નાખવી.

૨] ખાસ ધ્યાન રહે કે પૂરી ખમણી સાવ ધીમા તાપે શેકવાની છે.

૩] કોઈ કોઈ લોકો પાણી ને બદલે દૂધનો ઉપયોગ પણ કરતાં હોય છે, ૩-૪ ચમચી દૂધ ૨-૩ વખત થોડા થોડા અંતરે ઉપયોગમાં લઇ શકાય. (લગભગ ૧/૪ કપ જેટલું દૂધ ) ) દાળ પાકી જશે એટલે તેલ છૂટું પડશે. સામન્ય તેલ, દાળ કડાઈને ચોંટશે નહિ અલગ પડી જશે. ત્યારબાદ, આદુ, મરચાં અને લસણ ની પેસ્ટ ઉમેરવી અને ૩-૪ મિનિટ માટે હલાવતાં રેહવું અને શેકવી.

૪] ધ્યાન રહે કે ખમણી સર્વ કરો ત્યારે જ ઉપર સેવ છાંટવી, નહિ તો સેવ હવાઈ ને ઢીલી પડી જશે તો ખાવાના ઉપયોગમાં પસંદ નહિ આવે.

૫] સેવ ખમણી ને અમીરી ખમણી પણ કહીએ છીએ, તો તમને પસંદ હોય તો કાજુ અને કીસમીસ નો ઉપયોગ પણ કરી શકાય છે.

૬] સેવ ખમણી સાથે સર્વ કરો ત્યારે લીલાં મરચાં તળી ને આપી શકાય. અથવા લીલી કોથમીર ની ચટણી, કે લસણ ની ચટણી સાથે સર્વ કરી શકાય.

૭] ૧૨૫ ગ્રામ ચણા ની દાળ લઈએ તો તેમાં ૩ ટે.સ્પૂન ખાંડ, ૧ ટે.સ્પૂન લીંબુનો રસ, ૧/૨ કપ દૂધ ઉપયોગમાં લઇ શકાય. (દૂધ નો ઉપયોગ ના કરવો હોય તો પાણી નો ઉપયોગ કરી શકાય છે.) સામન્ય સંજોગમાં પાણીનો ઉપયોગ કરવો.

 

રીત નં. … ૨

સામગ્રી:

૫૦૦ ગ્રામ ચણાની દાળ
૨૦૦ – ૨૫૦ ગ્રામ તેલ
૧/૨ ચમચી રાઈ
૧ ચમચી તલ
૧ ચમચી વાટેલું લસણ
૨ ચમચી વાટેલાં આદુ -મરચાં
૧ ચમચી ખાંડ
૧ લીંબુ
૨૫૦ ગ્રામ ઝીણી (નાઈલોન) સેવ,
૧/૨ કપ કોપરાની છીણ
૧ દાડમ
૪ ચમચી ઝીણી સમારેલી કોથમીર
પ્રમાણસર મીઠું

 

રીત:

ચણાની દાળને છ થી આઠ (૬-૮) કલાક પાણીમાં પલાળીને વાટો. હવે તેને કૂકરમાં વરાળથી બાફીને ચાળણાથી ચાળી નાખો.
એક વાસણમાં વઘાર માટે તેલ, રાઈ, તલ મૂકીને વાટેલું લસણ નાખી વધારો. તેમાં દાળ નાખો. મીઠું, વાટેલા મરચાં, ખાંડ નાખો. થોડું પાણી નાખો. લીંબુ નીચોવો.

 

સાંતળાઈ જાય એટલે નીચે ઉતારી ડીશમાં કાઢી તેની પર ઈચ્છા મુજબ ઝીણી સેવ, કોપરાની છીણ, લાલ દાડમ અને કોથમીર ભભરાવીને પીરસો.

 

 

રીત નં …૩

ઉપરોક્ત બે રીત સિવાય, એક અન્ય રીત છે. કોઈ કોઈ લોકો નાઈલોન ખમણ ઢોકળા પહેલાં બનાવે છે અને ત્યાર બાદ,તે ખમણનો ભૂકો કરી અને તેને વઘારે છે અને તેનો સેવ ખમણી તરીકે ઉપયોગ કરે છે. આવા સમયે ખાસ ધ્યાન રહે કે નાઈલોન ઢોકળા બની ગયાં બાદ, તૂરત જ તેનો ભૂકો ના કરતાં ૩-૪ કલાક માટે ઢોકળા ઠંડા થવા દેવા, અને ત્યારબાદ, તેનો ભૂકો કરી અને ઉપર મુજબ વઘાર કરવો. ગરમા –ગરમ ઢોકળાનો ભૂકો કરશો તો તે ભૂકો છૂટો ના થતાં ચોંટશે અને ખમણી બરોબર નહિ લાગે.

 

ખમણી :

 

સામગ્રી :

(૧) ૩ કપ ચણાની દાળ

(૨) ૧ – કપ ચોખ્ખા

(૩) ૧ કપ અળદની દાળ

(૪) મીઠું

(૫) ખાંડ

(૬) ખાવાનો સોડા

(૭) તેલ

(૮) આદુ -મરચા

(૯) રાય

(૧૦) લસણ

(૧૧) હળદર

(૧૨) નાળિયેરનું ખમણ

(૧૩) કોથમીર

બનાવવાની રીત:

દાળ ને ચોખા ને સવારે પલાળી અને રાત્રે મીક્ષરમાં પીસી પેસ્ટ કારી દેવી.

મિકશીમાંથી પેસ્ટ બહાર કાઢી હલાવી અને બીજે દિવસે સવારે પેસ્ટમાં સ્વાદ અનુસાર મીઠું નાખવું.

ત્યારબાદ તેમાં આદુ -મરચાની પેસ્ટ, ૧ ચમચી હળદર, અને ૧ ચમચી  ખાવાનો સોડા નાખવો અને તે મિક્સ કરી અને થાળીમાં તેલ લગાડી અને ઢોકળાનું ખીરું તેમાં પાથરવું., અને ઢોકળાના ડબ્બામાં થાળી વરાળમાં મુકવી. ૫-૭ મીનીટમાં પાકી જશે., તે પાકી ગયા છે કે નહિ તે ચેક કરવા છરી તેમાં નાખી ચેક કરવું., જો છરીમાં કશું ચોટેલ ન હોય તો તે પાકી ગયા છે.

ત્યારબાદ, થાળી નીચે ઉતારી અને ઢોકળાને તાવિથાથી બહાર કાઢી અને તેનો ભુક્કો કરી એક કળાઈમા વઘાર માટે તેલ, રાય થોડી મૂકી અને તેમાં ખમણ નો ભુક્કો નાખવો., થોડું મિક્સ થઈ ગયાબાદ તેમાં લસણની પેસ્ટ, અને ૨ ચમચી ખાંડ ત્યારબાદ નાખવી., અને મિક્સ કરી તેને નીચે ઉતારી લેવું.

ગાર્નીસિંગ  (સુશોભન):

એક કાચના વાસણમાં / બાઉલમાં ખમણ કાઢી અને તેના ઉપર નાળિયેરનો ભુક્કો, સેવ અને કોથમીર છાંટવા., અને પછી પીરસવું.

કાજુ અને દ્રાક્ષ પણ અંદર નાખી શકો.

સંકલિત …

 

 

બ્લોગ લીંક: http://das.desais.net
Email: [email protected]

 

 

‘સેવ ખમણી/ અમીરી ખમણી ..’ ની અલગ અલગ રીતની પોસ્ટ પસંદ આવી હોય તો આપના પ્રતિભાવ બ્લોગ પોસ્ટ પર જરૂર મૂકશો. આભાર .. ! ‘દાદીમા ની પોટલી’.

કચ્છી દાબેલી …

કચ્છી દાબેલી …

તસ્વીર નેટ જગતને આભારી છે.

મૂળ કચ્છ -માંડવી માં જેનો ઉદ્ભવ સ્થાન છે, તે દાબેલી આજે કચ્છી દાબેલી તરીકી ફક્ત ગુજરાત-કચ્છમાં જ નહિ પરંતુ ભારતના મુખ્યત્વે અનેક શહેર અને રાજ્યોમાં અતિ પ્રચલિત છે. કચ્છમાં માંડવી – ભુજ વિગેરે શહેરમાં તેનો સ્વાદ માણવા જેવો છે. અમારે અહીં લંડન માં પણ ગુજરાતી રેસ્ટોરેન્ટમાં દાબેલી જોવા મળે છે. ચાલો આજે આપણે દાબેલી બનાવવાની રેસિપી જાણીશું અને માણીશું.

 

દાબેલી નો મસાલો …

 

સામગ્રી :

 

૧ નંગ લાલ મરચું
૧ ચમચી ધાણા
૪-૫ નંગ લવિંગ
૧ નંગ તજ નો ટુકડો
૨ ચમચી જીરું
૧/૨ ચમચી મરીનો ભૂકો
૨૫ ગ્રામ તલ નો ભૂકો
૧૦ ગ્રામ વરીયાળી
૧/૨ ટી. સ્પૂન હળદર
૧ ટે.સ્પૂન સૂકા કોપરા. નાળીયેરનું ખમણ
૧ ટી.સ્પૂન ખાંડ
૧/૨ ટી.સ્પૂન આમચૂર પાઉડર
૧ ટી.સ્પૂન તેલ

 

રીત:

એક કડાઈમાં તેલ મૂકી અને ગરમ કરવા મૂકો, તેમાં દાબેલીના મસાલા ની સામગ્રી હળદર, ખાંડ અને આમચૂર પાઉડર સિવાયના બધા મસાલા શેકી લો અને મસાલા ઠંડા પડે એટલે ખાંડ, હળદર, આમચૂર પાઉડર અને મીઠું મિક્સ કરી બધીજ સામગ્રી મિક્સર માં દળીને મસાલો તૈયાર કરી લેવો. અને એક એરટાઈટ ડબ્બીમાં ભરી લેવો.

 

સ્ટફિંગ / પૂરણ માટે ...

 

સામગ્રી :

૧ કપ બાફેલા બટેટા નો છૂંદો ( મેસ કરેલ બટેટા)
૧/૨ ચમચી જીરૂ
૧ પીંચ હિંગ
૨ ટી.સ્પૂન દાબેલી નો મસાલો (ઉપર ના મસાલા માંથી)
૨ ટે.સ્પૂન (ચમચા) ખજૂર આમલી ની ચટણી
૨ ટે.સ્પૂન (ચમચા) તેલ
મીઠું સ્વાદ અનુસાર
૧૨-૧૫ નંગ દાબેલી ના બર્ન – પાઉં (બ્રેડ) (નાના-મિડ્યમ)
બટર અથવા તેલ

 

સર્વ કરવા માટે …

 

૧ કાંદા બારીક સમારેલા
૧/૨ કપ શેકેલા શીંગ દાણા (મસાલા વાળા હોય તો તે ઉપયોગમાં લેવા)
૧/૨ કપ લીલી કોથમીર સમારેલી
૧ કપ નાઈલોન સેવ
૧/૨ કપ દાડમના દાણા
લસણ ની ચટણી
૫-૬ ટે.સ્પૂન ખજૂર – આમલી ની ચટણી
આંબોળીયા ની ચટણી

આંબોળીયા ની ચટણી બનાવવાની રીત અને સામગ્રી :
૧-૨ ચમચી આંબોળીયા પાઉડર
૧ લીંબુ
૨-૪ ચમચી ખાંડ / ગોળ
૧ ચમચી ગરમ મસાલો

બધીજ સામગ્રી મિક્સ કરી અને જરૂરી પાણી ઉમેરી મિક્સ કરવું, અને થોડું ગરમ કરવું. બસ ચટણી તૈયાર થઇ જશે.

દાબેલી નું સ્ટફિંગ બનાવવાની રીત :

એક કડાઈમાં જરૂરી તેલ લઇ અને ગરમ કરવા ગેસ પર મૂકો. ત્યારબાદ, તેમાં જીરૂ નાંખી અને શેકો, જીરૂ શેકાઈ જાય કે તરત હિંગ નાખો, ત્યારબાદ તૈયાર કરેલ દાબેલીનો મસાલો નાખો, (સ્વાદ અનુસાર) બટેટા મેશ કરેલ (છૂંદો) નાંખી અને મિક્સ કરો તેમાં સ્વાદ અનુસાર મીઠું નાખો અને ત્યારબાદ અડધો કપ પાણી નાંખીને સરખી રીતે મિક્સ કરી થોડો સમય ચડવા દયો. ત્યારબાદ ગેસ બંધ કરી અને પૂરણ /સ્ટફિંગ ને ગેસ પરથી ઉતારી લ્યો. ત્યારબાદ તેમાં ૨ ચમચા ખજૂર – આમલીની ચટણી નાંખી અને સરખી રીતે મિક્સ કરો. બસ દાબેલી નું સ્ટફિંગ તૈયાર છે.

 

સૌ પ્રથમ દાબેલી નું બર્ન / પાઉં હાથમાં લયો અને તને છરીથી વાછેથી કાપ મૂકી અને બે ભાગ કરવાના છે. બંને ભાગને બટર લગાડી અને તવા પર શેકી લો. ત્યારબાદ પાઉંના નીચે તરફના ભાગમાં (બોટમ તરફના) ઉપર ચટણી લગાડો અને તૈયાર કરેલ સ્ટફિંગ ઉપર મૂકો અને સ્પ્રેડ કરવું / પાથરવું. ત્યારબાદ, તેના પર કાંદા (જીણા સમારેલા), મસાલા વાળા શિંગ દાણા, લસણની ચટણી તથા ખૂજ-આમલી ની ચટણી લગાડો અને તેની ઉપર દાડમ ના દાણા, કોથમીર અને ઉપર નાઈલોન સેવ મૂકો અને પાઉંના અન્ય ભાગમા ચટણી લગાડી અને તે ઢાંકી ને બંધ કરો (કવર કરો) અને તેને ફરી તાવા પર થોડું ગરમ કરી અને ગરમા ગરમ દાબેલી સર્વ કરો.

 

લીલી ચટણી – લસણની ચટણી – ટામેટા સોસ -કેચપ સાથે સર્વ કરી શકાય છે.

 

નોંધ: અહીં દર્શાવેલ અલગ અલગ ચટણી ની રેસિપી બ્લોગ પર ચટણીની કેટેગરી પરથી મેળવી શકાશે.

સુજાવ:

સ્ટફિંગ તૈયાર કરો ત્યારે તેમાં દાડમના દાણા પણ મિક્સ કરી શકાય છે, અને ઉપર ગાર્ન્સિંગમાં જ ફક્ત ઉપયોગ કરવા હોય તો તેમ પણ કરી શકાય છે.

આદુ -લીલા મરચાની પેસ્ટ નો પણ ઉપયોગ કરી શકાય છે. અથવા લીલા મરચાં પસંદ હોય તો તેણે બારીક સમારી સ્ત્ફીન્ગમાં ઉપયોગમાં લઇ શકાય છે.

હાલમાં આપણી માર્કેટમાં પણ દાબેલીના મસાલા ના તૈયાર પેકેટ મળે છે, જેનો ઉપયોગ પણ કરી શકાય છે.

 

બ્લોગ લીંક: http://das.desais.net
Email: [email protected]

 

‘કચ્છી દાબેલી’ ની રેસિપી જો આપને પસંદ આવી હોય તો આપના પ્રતિભાવ બ્લોગ પોસ્ટ પર મૂકવા વિંનતી. આભાર ! ‘દાદીમા ની પોટલી’ …

ફાફડા … (ગાંઠીયા … રેસિપી) …

ફાફડા … (ગાંઠિયા) …

 

ફાફડા..  ગાંઠીયા ગુજરાતી પ્રજા માટે અગત્યનો અને પસંદગીનો ખોરાક છે. સૌરાષ્ટ્ર તેમજ ગુજરાતમાં જ નહિ પરંતુ વિશ્વમાં અનેક મોટા દેશોમાં જ્યાં જ્યાં  ગુજરાતીઓ વસે છે ત્યાં ફાફડા જોવા મળશે. જેમ કે લંડન માં વેમ્બલી- સાઉથ હોલ, લેસ્ટર, વેલિંગબરો જેવા મોટા એરીયામાં પણ ફાફડા ગરમા ગરમ ખાવા મળે છે.

 

સૌરાષ્ટ્રમાં મોટેભાગે  ફાફડા – જલેબી તેમજ ગાજરનું ખમણનો સંભારો, કોબી મરચાનો સંભારો સાથે તળેલા મરચાં પસંદ કરવામાં આવતા હોય છે. જ્યારે ગુજરાતમાં જીણી મરચી, તેમજ ક્ફ્ત ચણાના લોટની બનાવેલી જાડી કઢી પીરસવામાં આવતી હોય છે,  કોઈ કોઈ જગ્યાએ પપૈયાનું ખારીયું-સંભારો પણ આપવામાં આવતો હોય છે. ચણાના લોટની કઢી હળદર, મીઠું, લીમડાના પાન (કરી પતા) લીલા મરચાં સાથે આખા ધાણા નો વઘાર કરી બનાવવામાં આવતી હોય છે.

 

 

ચાલો આજે ઘેર આપણે ફાફડા બનાવીએ …

 

 

સામગ્રી :

 

૨૫૦ ગ્રામ ચણાનો લોટ (૨-કપ)

૧/૨ ટે..સ્પૂન મીઠું – સ્વાદ અનુસાર

૧/૨ ચમચી ખાવાનો સોડા

૧/૪ ચમચી થી જરા ઓછું લાલ મરચું (જેને પસંદ હોય તેના માટે)

૧/૨ ટે.સ્પૂન અજમો

૨ ટે.સ્પૂન તેલ

ફાફડા તળવા માટે જરૂરી તેલ

 

 

રીત:

 

એક વાસણમાં ચણાના લોટ ને ચારણીમાં ચારી લેવો અને અલગ રાખવો. ત્યારબાદ, ચણાના લોટમાં મીઠું, ખાવાનો સોડા, લાલ મરચાનો પાઉડર (પસંદ હોય તો જ) અજમો અને ૨ – ટે.સ્પૂન તેલ નાંખી અને હાથની મદદ વડે તેને સારી રીતે મિક્સ કરવું.

 

ત્યારબાદ, હુંફાળા ગરમ પાણીની મદદથી લોટને નરમ  રહે તેમ ગુંથવો. લોટને સતત ઊઠાવતા રહેવું અને નીચે પટકાવતા  રેહવું ., આમ ૭-૮ મિનિટ માટે સતત મસળવો અને નરમ લોટ ગુંથવો. (લોટને ગુંથવા માટે લગભગ ૧/૨ કપ પાણી ની જરૂર પડશે.)  લોટ ગુંથાઈ ગયા બાદ, ૧/૨ કલાક માટે ઢાંકીને અલગ રાખી દેવો.

 

 

 

 

૧/૨ કલાક બાદ થોડું જરૂર લાગે તો ગરમ તેલ લગાડી અને ફરી મસળવો અને મુલાયમ બનાવવો. ફાફડા માટે લોટ તૈયાર છે. લોટના નાના નાના લુઆ (ગોઈણા) બનાવવા.

 

ફાફડા વણવા (બનાવવા) માટે એક લીસી સપાટી વાળુ લાકડાનું બોર્ડ લેવું. બોર્દ્પર હાથની હથેળી નીચે એક લુઆ ને રાખવો અને   લોટના લુઆ ની લાંબી પતલી બે ઈંચ થી થોડી પહોળી  પટ્ટી થાય તેમ હથેળી દ્વારા ભાર/વજન આપી અને ખેંચવો. ફાફડાને  ત્યારબાદ પતલી છરી  તે માટે ખાસ હોય છે તેના દ્વારા લોટની નીચેથી છરી સરકાવી અને ફાફડા  ને બોર્ડ પરથી અલગ કરી  અને  ગ્રીસ કરેલી થાળીમાં ફાફડા ને મૂકવો.

 

આમ ધીરે ધીરે બધાજ ફાફડા વણી લેવા (બનાવી લેવા) અને થાળીમાં અલગ રાખવા.

 

 

 

 

એક કડાઈમાં તેલ લઇ અને તેને ગરમ કરવા મૂકવું. તેલ ગરમ થાય એટલે કડાઈ ની સાઈઝ ને ધ્યાનમાં લઇ ૧-૨-૩ ફાફડા ને તળવા માટે કડાઈમાં નાખવો અને ધીરે ધીરે ઝારા ની મદદથી પલટાવતાં જવું અને આછો બ્રાઉન કલર થાય ત્યાં સુધી તળવો અને ત્યારબાદ, થાળીમાં અલગથી રાખી દેવા. ધીરે ધીરે બધાજ ફાફડા તળી લેવા.

 

જો તમારી સ્પીડ/ઝડપ ફાફડા વણવામાં સારી હોય તો તેલ ગરમ કરી અને જેમ જેમ ફાફડા  વણાતા  જાય તેમ તેમ તેલમાં નાંખી અને તળવા  જોઈએ. પરંતુ તે  રીત અનુકુળ ના આવે તો બધાં ફાફડા વણી લીધાં બાદ જ કડાઈમાં તળવા.

 

ફાફડા તૈયાર છે.   ઉપર થોડી કે સ્વાદ મુજબ હિંગ નો છંટકાવ કરી  અને જલેબી જો ઘરમાં તૈયાર મંગાવી ને રાખી હોય તો તેની સાથે, અથવા   લીલી કોથમીર મરચાની ચટણી સાથે કે  લીલાં તળેલા મરચાં , કોબી મરચાં કે ગાજર મરચાં ટામેટા ના સંભારા સાથે પીરસવા અને ખાવા.

ફાફડાનો  ઉપયોગ કરી લીધાં બાદ પણ ફાફડા વધે તો તેને એર ટાઈટ ડબ્બામાં રાખી દેવા અને જ્યારે ઉપયોગમાં લેવા હોય ત્યારે તેને ડબ્બામાંથી કાઢી અને ગરમ – ગરમ ચા સાથે ખાવાના ઉપયોગમાં લઇ શકાય છે. ફાફડાનો ઉપયોગ યોગ્ય જાળવણી કરવાથી લાંબો  સમય સુધી કરી શકાય છે, તે બગડતા નથી.

 

સુજાવ: ફાફ્ડાને  બોર્ડ પરથી  ઉઠાવવા  માટે પતલી ખાસ છરી નો ઉપયોગ કરવામાં આવે છે.  આજ લોટમાં તમે આખા કાળા મરી ને ખાંડી અને નાંખી લોટમાં મિક્સ કરી અને વણેલા ગાંઠીયા પણ બનાવી શકો છો.  

 

નોંધ : આપને ફાફડાની પોસ્ટ પસંદ આવી હોય તો જરૂર ઘરે એક વખત બનાવશો અને આપના અનુભવ, અભિપ્રાય દ્વારા બ્લોગ પોસ્ટ પર જણાવશો, જે સદા અમોને પ્રેરણાદાયી બની રહે છે.

 

બ્લોગ લીંક: http://das.desais.net
Email: [email protected]

પૌવા ની કટલેસ (રેસિપી) …

પૌવા ની કટલેસ … (રેસિપી)

 

 કટલેટ-કટલેસ તો તમે બનાવતાં જ હશો, પરંતુ કટલેસ માં પણ થોડું વૈવિધ્યતા લાવીએ તો તે સ્વાદિષ્ટ અને પૌષ્ટિક પણ  બની શકે છે અને બાળકો તેમજ મોટા સૌ  ઘરમાં પસંદ કરે છે.  આજે આપણે એક સરસ અને સ્વાદિષ્ટ પૌવા ની કટલેસ (વ્યંજન) ની રેસિપી માણીશું.  

તમને આ રેસીપી પસંદ આવી હોય તો જરૂર આપના અમૂલ્ય પ્રતિભાવ બ્લોગ પોસ્ટ ના કોમેન્ટ્સ બોક્ષમાં મૂકશો.  આપના દરેક પ્રતિભાવનું બ્લોગ પર સ્વાગત છે.

 

 

 

પૌવા (Rice Flakes) નો ઉપયોગ આપણે સામન્ય સંજોગમાં, બટેટા પૌવા, પૌવાનો ચેવડો કે કોઇપણ વ્યંજન / રેસિપીમાં બાઈન્ડીંગ ના ઉપયોગમાં કરીએ છીએ.  પરંતુ પૌવા માંથી બનતી કટલેસ ખૂબજ સ્વાદિષ્ટ બને છે. પૌવા ની કટલેસ આપણે  સવારે કે સાંજના નાસ્તા માટે બનાવી શકીએ છીએ.

 

સામગ્રી :

 

૧ કપ પૌવા  (Beaten Rice / Rice Flakes)

૨ નંગ બાફેલા બટેટા

૩/૪ – ચમચી મીઠું. સ્વાદાનુસાર

૧ નંગ  ૧” ઈંચ નો આદૂનો ટુકડો

૨ નંગ લીલા મરચાં – બારીક સમારેલા

૨-૩ ટે.સ્પૂન લીલી કોથમીર સમારેલી

૩ નંગ બ્રેડ

૨ ટે.સ્પૂન મેંદો

૧/૪ ચમચી કાળા મરી નો પાઉડર

 

 

રીત:

 

સૌથી પ્રથમ પૌવાને એક ચારણીમાં નાંખી અને પાણીથી પલાડવા, પાંચ મિનિટમાં પૌવા પલળી જશે અને તૈયાર થઇ જશે.

 

બટેટાને મેસ (છૂંદો) કરવા અને તે  મેસ બટેટામાં પલાળેલ પૌવા ને મિક્સ કરવા. ત્યારબાદ, આદું, લીલા બારીક સમારેલ મરચાં, લાલ મરચાનો પાઉડર, અડધી ચમચી મીઠું અને લીલી સમારેલી કોથમીર… આ બધું ભેળવીને સારી રીતે મિક્સ કરવું અને પૂરા મિશ્રણ ને લોટની જેમ ગૂંથવું અને તૈયાર કરવું. કટલેસ બનાવવા માટે મિશ્રણ તૈયાર છે.

 

(નોંધ : આપને ખટાસ અને મીઠાશ બંને પસંદ હોય તો આમચૂર પાઉડર અને થોડી સાકર (ખાંડ) નો પ્રયોગ કરી શકાય છે.  આ ઉપરાંત પૌષ્ટિક વધુ બનાવવા માટે  ગાજર  -મકાઈના દાણા કે બીન્સનો ઉપયોગ પણ કરી શકો છો.)

 

મેંદા માં ૧/૪ – કપ પાણી નાંખી અને તેનું મિશ્રણ બનાવવું, ખ્યાલ રહે કે તે  મિશ્રણમાં ગંઠોડા ના પડે – ગાંઠા ના રહે.  મિશ્રણ પતલુ બનાવાવાનું છે.  કાળા મરી અને મીઠું જે બાકી બચેલ છે તે તેમાં ઉંમેરી અને મિક્સ કરવું.

 

બ્રેડને તોડી અને મિક્સરમાં તેનો ચૂરો/ભૂકો કરવો. (બ્રેડ ક્ર્મ્પસ્ તૈયાર મળે છે તે ઉપયોગમાં લઇ શકાય)

 

કટલેસ ના  મિશ્રણ માંથી થોડું મિશ્રણ હાથમાં લઇ અને (લીંબુના માપ જેટલું) અને તેને ગોળો બનાવી અને હાથની મદદથી તેને ગોળ અથવા ચપટો/ લંબગોળ આકાર આપવા કોશિશ કરવી અને તે આકાર આપ્યા બાદ, કટલેસને મેંદાના મિશ્રણમાં ડૂબાડવી અને બહાર કાઢ્યા બાદ, બ્રેડના ચૂરા/ભૂકામાં મૂકી અને તેને ચારે બાજુથી લપેટવી.  હાથની મદદથી ચારેબાજુ દાબવું અને બ્રેડનો ચૂરો સરખી રીતે લગાડવો અને ત્યારબાદ, તે કટલેસ ને એક પ્લેટમાં અલગથી રાખવી.   (હાથથી દાબવાથી બ્રેડ નો ભૂકો સરખી રીતે કટલેસ પર લાગી જશે/ ચોંટી જશે.)

 

આમ ધીરે ધીરે બધાજ મિશ્રણની  કટલેસ બનાવી લેવી અને પ્લેટમાં અલગ રાખી દેવી. બનાવેલ કટલેસ ને ૧૫ મિનિટ સુધી પ્લેટમાં રાખવી, જેથી બધી કટલેસ સેટ થઇ જશે.

 

કટલેસ ને  બે રીતે બનાવી શકાય છે, ડીપ ફ્રાઈ કરી ને અથવા સેલો ફ્રાઈ કરીને.  આત્યારે આપણે સેલો ફ્રાઈ કરીશું.

સેલો ફ્રાઈ કરવી હોઈ તો એક સમતલ તાવી /કડાઈમાં (નોન સ્ટિક હોય તો વધુ સારું) લેવી અને તેમાં ૨-૩ ટે.સ્પૂન તેલ નાંખી અને તાવીમાં સમાઈ તેટલી કટલેસ મૂકવી અને ધીમા તાપે તેને શેકવી. કદાચ તેલ ઓછું જણાય તો થોડું તેલ ઉપર લગાડી શકાય છે. કટલેસ ને ધીમા તાપે ગોલ્ડન બ્રાઉન કલર આવે તેમ ચારે બાજુ- બંને તરફથી તળવી/ શેકવી.  શેકતી સમયે તેને  વારંવાર પલટાવતાં જવું અને શેકવી.

 

બધી જ કટલેસ આ રીતે ધીમા તાપે શેકવી અને શેકાઈ ગયા બાદ, એક પ્લેટમાં અલગથી રાખવી. ક્રિસ્પી અને સ્વાદિષ્ટ પૌવાની કટલેસ તૈયાર છે.

 

પૌવાની કટલેસ ને લીલી કોથમીરની ચટણી સાથે અથવા આમલી ની મીઠી ચટણી સાથે પીરસવી.

 

બ્લોગ લીંક: http://das.desais.net – ‘દાદીમા ની પોટલી’

email: [email protected]

રાજ કચોરી ….(રાજસ્થાની) …

રાજ કચોરી ….(રાજસ્થાની)…

 

રાજ કચોરીમાં ભરવાનો માવો અનેક સ્વાદોથી ભરેલો હોય છે. જે બનાવવામાં ખૂબજ સરળ અને એક નવું જ સ્વાદિષ્ટ વ્યંજન છે.

 

કચોરી નું પડ બનાવવા માટે :

 

સામગ્રી:

 

૨૦૦ ગ્રામ રવો (૧-કપ)

૨ ટે. સ્પૂન મેંદો

૧/૨ -નાની ચમચી મીઠું (સ્વાદાનુસાર)

તેલ તળવા માટે જરૂરી…

 

કચોરીમાં ભરવાં માટેનો માવો (પુરણ)

 

સામગ્રી:

 

૨-૩ નંગ બટેટા (બાફેલા) (તેને નાના કટકા મા સમારવા)

૧/૨ -કપ મગ – ચણા (બાફેલા)

૨૦ નંગ મેંદાની નાની પુરી

૧૦ નંગ પાણીપુરી ની પાપડી

૪૦૦ ગ્રામ દહીં (૨-કપ) ફેંટી લેવું

૨ નાની ચમચી શેકેલું જીરું

૧ નાની ચામચી કાળા મરી નો ભૂકો

૧ નાની ચામચી લાલ મરચાનો પાઉડર

૧/૨ – કપ મીઠી ચટણી

૧/૨ – કપ લીલી ચટણી

૧/૨ – કપ મિક્સ ફરસાણ (ચેવડો-સેવ-ગાંઠીયા-બુંદી..વગેરે)

૧/૨ -કપ દાડમના દાણા

૧/૨ -કપ લીલી કોથમીર (બારીક સમારેલી)

 

રીત :

 

રવો અને મેંદાને એક વાસણમાં કાઢવા અને તેમાં મીઠું અને એક ટે.સ્પૂન તેલ નાંખી અને સારી રીતે મિક્સ કરવું. ત્યારબાદ, જરૂરી પાણી નાંખી અને કઠણ લોટ બાંધવો.

 

લોટને ૧/૨ કલાક માટે ઢાંકીને અલગથી રાખી દેવો. ત્યારબાદ, તેણે એકદમ મસળીને નરમ બનાવવો. જે કચોરી બનાવવા માટે તૈયાર થઇ જશે.

 

ભારે તળિયાવાળી એક કડાઈમાં તેલ લઇ અને તેને ગરમ કરવા મૂકવું.

 

કચોરી માટે લોટ તૈયાર રાખેલ, તેના નાના – નાના ગોળા એકસરખા બનાવવા. એક ગોળાને લઇ અને તેની લગભગ ૩ ઈંચ ની પૂરી વણવી અને તેલમાં તળવી. પૂરીને તેલમાં નાખ્યા બાદ, ઝારાથી થોડી દબાવતાં રેહવું જેથી તે ફૂલીને દડો થશે. પૂરી ફૂલે કે તૂરત તાપ ધીમો કરી દેવો. અને ઓછા તાપે પૂરીને બ્રાઉન કલરની બંને બાજુ થાય તેમ તળવી. તળેલી પૂરીને એક પ્લેટમાં પેપર નેપકીન પાથરી અલગથી ઠંડી કરવા રાખી દેવી.

 


ધીરે-ધીરે બધીજ પૂરી તળી લેવી. કચોરીની પૂરી તૈયાર છે.,

સુજાવ : જો તમને  પસંદ હોય તો,કાંદા અને લસણ  ઉપયોગમાં લેવા હોય તો લસણની ચટણી અને ઝીણા સમારેલા કાંદા પણ ઉપયોગમાં લઇ શકાય છે. 

 

 

હવે તેમાં ભરવાં માટેની સામગ્રી કે જે આપણી પાસે તૈયાર છે, જે જ્યારે આપણે ખાવા બેસીએ ત્યારે સૌ પ્રથમ પૂરીના પાતળા પળમાં વચ્ચેથી ખાડો કરવો અને તેમાં સૌ પ્રથમ, ૩-૪ નાના પીસ બટેટાના નાખવા, પછી, મગ, અથવા ચણા (જે કઠોળ બનાવેલ હોય તે) , ફરસાણ , ફરસી પૂરીના કટકા, પાણીપુરીની પાપડી પૂરી ને દહીંમા બોળીને નાંખવી. તેની ઉપર શેકેલું જીરું છાંટવું, ત્યારબાદ, મરીનો ભૂકો, લાલ મરચાનો ભૂકો, મીઠી ચટણી, દહીં, લીલી ચટણી, જીણી સેવ, અને સૌથી ઉપર દાડમના દાણા છાંટવા. ત્યારબાદ, ફરી શેકેલું જીરું, દહીં, ચટણી અને લીલી કોથમીર છાંટી અને પીરસવી.


બસ, સ્વાદિષ્ટ રાજ કચોરી તૈયાર થઇ ગઈ, ખાવ અને મઝા કરો.

 

કચોરીમાં ભરવાની સામગ્રીમાં તમે તમારી રીતે ફેરફાર કરી શકો છો. કોઈપણ સામગ્રી વધુ-ઓછી કરી શકો છો, ધારો કે તમારી પાસે પાપડી નથી તો કચોરીની પૂરી ભાંગી શકાય, કોઈપણ કઠોળ લઇ શકો છો. મગ,મઠ, લીલાં વટાણા, ચણા, સફેદ અથવા કાળા.

પૂરી બનાવવાની ઝંઝટમાં પડવું ના હોય તો તમે પાણીપૂરીની પૂરીનો પણ ઉપયોગ કરે શકો છો. જે પૂરીમાં માવો/ પૂરણ બહુજ ઓછું ભરી શકાશે.

 

બ્લોગ લીંક: http://das.desais.net

 

નોંધ: આપને પોસ્ટ પસંદ આવી હોય તો આપના અમૂલ્ય પ્રતિભાવ બ્લોગ પોસ્ટ પરના કોમેન્ટ બોક્ષમાં જરૂરથી મૂકશો, જે સદા અમોને પ્રેરણાદાયી તેમજ માર્ગદર્શક બની રહેશે …

પાણીપૂરી …

પાણીપૂરી ..

(૧૦-૧૨ વ્યક્તિઓ માટે)



પાણી પૂરીનો આત્મા એનું પાણી જ છે.  પૂરી, મગ, ચણા, બુંદી, બટાટા, મીઠી ચટણી એ બધું જ સામાન્ય છે.  પૂરી જાતે બનાવવી અથવા તૈયાર લઇ લેવી.  પૂરી જાતે બનાવવા નીચે આપેલ લીંક પર ક્લિક કરશો. આપણી આ જ સાઈટ પર તે પોસ્ટ જાણવા મળશે.


પાણીપુરી ( ગોલગપા ) …

પાણી બનાવવાનું શરૂ કરીએ તે પહેલાં થોડીક અગત્યની વાત.


પાણી પૂરી માટેનું પાણી ઠંડું હોય તે સારૂ છે.  પણ ચિલ્ડ નહિ માત્ર કોલ્ડ જોઈએ.  મીઠી ચટણી,ખજૂરની, ગોળ, આંબલી અને જીરૂ (ધાણા જીરૂ નહિ)  લાલ મરચું તથા નમક નાખીને બનાવવાની. આમાં એકપણ વધારાની ચીજ ન જોઈએ અને કોઈની બાદબાકી પણ નહી. કરવાની.

મગ અને ચણાને રાતભર પલાળીને રાખી મુકવાના.  પછી બાફ્વાના.  માગ માટે પ્રેશર કૂકર ન વાપરો તો સારૂ.  મગ, બટેટા અને ચણા ને સહેજ મસાલેદાર બનાવવા નામક, લાલ મિર્ચ, અને થોડું સંચળ તથા જીરૂ ઉપર છાંટવા.

 

સામગ્રી :


૧ કિલો ફૂદીનો  (ચૂંટાયા પહેલાનું વજન)

૨૫૦ ગ્રામ લીલી કોથમીર (ડાળખી સહિતનું વજન)

૫૦ ગ્રામ લીલા મરચાં

૧ મોટી કટોરી (વાટકી) ગોળ

૫૦ મી.લી.  આંબલીનો પલ્પ

૮ ટી.સ્પૂન સંચળ (નાની ચમચી)

૩-૧/૨ ટી. સ્પૂન સિંધવ

૧ ટી.સ્પૂન ચીલી ફ્લેક્સ

૧/૪ ટી. સ્પૂન હિંગ

૫-૧/૪  (સવા પાંચ) લીટર પાણી

૧-૧/૨ ટી. સ્પૂન સૂંઠ

 

રીત :


ફૂદીનો ચૂંટીને બે વાર પાણીમાં ધોઈ નાખવો.  ત્યારબાદ ૧-૧/૨ (દોઢ) લીટર પાણી લઇ મિક્સરમાં વાટીને એક તપેલામાં બાજુએ મૂકી દો.  એજ તપેલામાં વધુ દોઢ લીટર પાણી ઉંમેરો.  આમ ફૂદિનાનું પાણી કુલ ૩ લીટર થશે.

એજ રીતે કોથમીરનું પાણી ૧ લીટર બનાવો અને મરચાનું પાણી ૨૫૦ મી.લી. બનાવો.  મરચાં વાટતી વખતે ૧ નાની ચમચી નામક અને અડધું લીંબુ ઉમેરવું. જેથી તેના રંગ, સ્વાદ અને સુગંધ જળવાઈ રહે.

ખાસ ધ્યાન એ રાખવાનું કે આ સિવાય તમારે ક્યાંય નમક, લીંબુ કે સાકર, લીલાં મરચાનો પાઉડર વાપરવાનો નથી.  આ કામ સિંધવ, સંચળ તથા આંબલી, આમચૂર અને ગોળ તેમ જ લીલાં મરચાં, ચીલી ફ્લેક્સ પર છોડી દેવાનું છે.

 

સુજાવ : ફૂદિનાનું પાણી મોટી ગરણી દ્વારા ગાળી નાખવું.  ગરણીમાં રહેલો ફૂદીનો બહુ ઘસીને, નીચોવીને કે દબાવીને ગાળશો તો સ્વાદ કડવો (કડૂચો) થઈ જશે.

 

ફૂદીનાને હળવા હાથે થપથપાવીને ગાળવું.  તેમાં કોથમીર તથા મરચાનું પાણી ઉમેરવું.  આ થયું સવા ચાર લીટર પાણી.

હવે બીજા એક તપેલામાં ૧ લીટર પાણી લઇ એમાં ગોળ ને ઓગાળો.  ત્યારબાદ, આંબલીનો પલ્પ, મરી, જીરૂ, સિંધવ, સંચળ, ચીલી ફ્લેક્સ, હિંગ, સૂંઠ તથા આમચૂર નાંખી બરોબર મિક્સ કરો.  સરસ સુગંધ આવશે.

હવે આ એક લીટર પાણી ને પેલા સવા ચાર લીટર પાણી સાથે મિક્સ કરી દેવું.

 

આ પાણી ને ૬-૮ કલાક માટે રાખી મૂકવું.  પાણી તૈયાર છે, હવે તેને જમવાના ઉપયોગમાં કે પીરસવાના ઉપયોગમાં લઇ શકાય છે.


 

સુજાવ: પાણી પૂરીનું  પાણી ઠંડું કાર્યા બાદ તમે ખારી બુંદી પણ તેમાં નાંખી શકો છો. જે એક પ્રકારનો શણગાર / ગાર્નિશિંગ છે.

 

બ્લોગ લીંક: http://das.desais.net

“કર્જત વડા પાંવ” …(મહારાષ્ટ્રીયન)

“કર્જત વડા પાંવ” …(મહારાષ્ટ્રીયન) …
મિત્રો આજે ફરી એક વખત શ્રીમતિ પૂર્વિબેન મોદી – મલકાણ (યુ એસ એ) ની રેસિપી બ્લોગ પર માણીશું,  ‘દાદીમા ની પોટલી’ પર રેસિપી મોકલવા બદલ  અમો તેમના અત્રે આભારી છીએ…  તેમની અન્ય  કૃતિઓ – રચનાઓ,   રેસિપી … વગેરે માણવા તમો બ્લોગ ની મુલાકાત લઇ બ્લોગ પોસ્ટ પર માણી શકો છો.. જે માટે ફેશબુક પરના પાઠક મિત્રો તેમજ ગુજરાત ગૌરવ ગાથા  તેમજ અન્ય વેબ સાઈટના પાઠક મિત્રો  આ સાથે જણાવેલ લીંક ની મૂલાકાત  જરૂરથી લેશો – http://das.desais.net ‘દાદીમાની પોટલી’ અને આપના પ્રતિભાવ બ્લોગ પોસ્ટ પર જરૂરથી મૂકશો.


ઘરથી દૂર હોવા છતાંયે ક્યારેય દૂર ન ગયા હોવાનો અહેસાસ ત્યારે થાય છે જ્યારે ઘરમાં પોતાના ગામનો સ્વાદ બનાવીએ. આજે એવો જ એક સ્વાદ આપની સમક્ષ મૂકી રહી છું “કર્જત વડા પાઁવ” રૂપે. મુંબઈથી દક્ષિણ તરફ જનાર કોઈપણ ટ્રેનો કરજતના વડા પાઉંનો સ્વાદ લેવા માટે ચોક્કસ ઊભી રહે છે.
સામગ્રી:
૧) ૯ થી ૧૦ મિડિયમ સાઈઝના બાફેલા બટાટા
૨ )પાંઉ-બ્રેડ
૩ ) લસણની સૂકી ચટણી અને કોથમીરની લીલી ચટણી
૪ ) બારીક સમારેલી કોથમરી
લસણની સૂકી ચટણી માટેની સામગ્રીઓ :
લસણની કળીઓ ૨૦ થી ૨૫
લાલ મરચાનો પાવડર
સૂકા નાળિયેરનો પાવડર
તલ
ધાણાજીરૂ
મીઠું (સ્વાદાનુસાર)
તેલ
બધી જ સામગ્રી મિક્સ કરીને વાટી લેવી.
લીલી ચટણી માટેની સામગ્રીઓ :
કોથમરી
શિંગદાણા
લીલા મરચાં ૬ થી ૭
લીમડાના પાન
લીંબુનો રસ
સાકર
મીઠું સ્વાદ અનુસાર
થોડું પાણી
બધી જ સામગ્રી મિક્સ કરી વાટી લેવું.
મસાલાની સામગ્રી:
૧ ) આમચૂર પાઉડર
૨ ) સ્વાદાનુસાર મીઠું
૩ ) નાનો ટુકડો આદુ
૪ ) ૪ થી ૫ કળી લસણ
૫ ) ૫ થી ૮ લીલા મરચા
૬ ) ૧/૨ – કપ સમારેલી કોથમીર
૭ ) ૨ -ચમચી તેલ
૮ ) હળદર
૯ ) મીઠા લીમડાના પાન
વડા તળવા માટેની સામગ્રી:


૧ ) ૨- કપ ચણાનો લોટ
૨ ) ૧-ચમચી હળદર
૩ ) સ્વાદાનુસાર મીઠું
૪ ) તળવા માટે તેલ
૫ ) લાલ મરચાનો પાવડર
રીત:
૧ ) આદુ, મરચા અને લસણની પેસ્ટ અને સમારેલી કોથમીર ઉમેરી સારી રીતે મિક્સ કરો
૨ ) તેલ ગરમ કરી તેમાં હળદર, આદું,મરચાં અને લસણની પેસ્ટ નાખવા અને સરસ રીતે મિક્સ કરી થોડીસેકન્ડ માટે સાંતળવું.થોડી કોથમરી પણ તેમાં નાંખી મિક્સ કરવી.
૩ ) બાફેલા બટાટાનો ગાંઠા ન રહે તેમ માવો બનાવવો
૪ ) બાફેલા બટેટાના માવામાં સાંતળેલો મસાલો, મીઠું, આમચૂર પાવડર ઉપરથી બીજી થોડી વધુ કાપેલી કોથમરી નાખીને મિક્સ કરીને તેનાં ગોળા બનાવો..
૫ ) ચણાનાં લોટમાં મીઠું , હળદર અને લાલ મરચું ઉમેરી તેમાં થોડું પાણી ઉમેરી મિક્સ કરો. તે વધારે જાડું અથવા તો વધારે ઢીલું પણ ન થાય.
૬ ) એક કઢાઈમાં આ વડા તળવા તેલ ગરમ કરો.
૭ ) આ ચણાનાં લોટની પેસ્ટમાં બટાટા વડાનાં ગોળા ડૂબાડી ગરમ તેલમાં ગોલ્ડન બ્રાઉન તળો.
પહેલા પાંઉને વચ્ચેથી કાપી વચ્ચે લસણની સૂકી ચટણી અને કોથમીરની ચટણી લગાડી તેની ઉપર આ તળેલા વડા મૂકો.
નોંધ- આમલી ગોળ અને ખજૂરની બનાવેલી મીઠી ચટણીનો ઉપયોગ પણ કરી શકાય છે.
આમલીની ચટણીના બદલે એપલ બટરમાં પાણી, લાલમરચું, મીઠું, ધાણાજીરું નાખી મિકસ કરીને તેનો ઉપયોગ પણ કરી શકાય.
જે લોકો આમલી ન ખાતા હોય તેમને માટે એપલ બટરની ચટણી અતિ ઉત્તમ છે.
નોધ: બટેટાના આ જ માવામાંથી બીજી એક અન્ય સામગ્રી પણ બને છે તેનું નામ છે “પતૌડી” તેનો પણ આપણે થોડા જ સમય પહેલા સ્વાદ બ્લોગ પોસ્ટ પર માણેલ…
(રસ પરિમલમાંથી)
-પૂર્વી મલકાણ – મોદી -(યુ.એસ.એ.)

મેથીના ઢેબરા …

મેથીના ઢેબરા …

સમય: ૧ કલાક

૪-૫ વ્યક્તિ માટે 

 

શિયાળો – ઠંડી ઋતુમાં બાજરો ખાવો જોઈએ અને તે ખૂબજ સ્વાદિષ્ટ હોય છે.  શિયાળામાં બાજરો તેમજ લીલી મેથી (Fenugreek Leaves) પણ બજારમાં સારી મળે છે. જે ખૂબજ પૌષ્ટિક આહાર છે. કસૂરી મેથીનો પણ ઉપયોગ કરી શકાય છે. આજે આપણે મેથીના ઢેબરા બનાવીશું.

 

સામગ્રી :

૨૫૦ ગ્રામ બાજરાનો લોટ (૨-કપ)

૧૭૫ ગ્રામ ઘઉંનો લોટ (૧-૩/૪ – કપ)

૧૦૦ ગ્રામ રવો (૩/૪ કપ)

૭૫ ગ્રામ મકાઈ નો લોટ (૧/૩ – કપ)

૨ કપ લીલી મેથી (બારીક સમારેલી)

૧ ટે.સ્પૂન તલ (સફેદ)

૧/૨ નાની ચમચી જીરૂ

૨૦૦ ગ્રામ ખાટું દહીં (૧ –કપ)

૧ નાની ચમચી ગોળ

૧ નાની ચમચી મીઠું (સ્વાદાનુસાર)

૨ લીલા મરચાં

૧ નાનો ટુકડો આડું (૧-ઈંચ લંબાઈમાં)

૧/૪ નાની ચમચી લાલ મરચાનો પાઉડર

૧/૪ ચમચી હળદર પાઉડર

તેલ ઢેબરા તળવા માટે જરૂરી

રીત:

બાજરાના લોટમાં ઘઉંનો લોટ, મકાઈનો લોટ અને રવો એક ચારણીથી ચાળી અને એક વાસણમાં મિક્સ કરવો.

મેથીને ધોઈ ને તેના પાન પરથી પાણી હટાવી અને બારીક સમારી લેવી. મરચાં ની ડાળખી તોડી મરચાંને ધોઈ ને તેમાંથી બી કાઢી અને બારીક સમારી લેવા. આદુને છીણી અને તેની પેસ્ટ બનાવી લેવી. દહીંમાં ગોળ મિક્સ કરી દેવો.


લોટમાં વચ્ચે ખાડા જેવી જગ્યા કેરી તેમાં જે ગોળ દહીંમાં મિક્સ કરેલ તે દહીં, ૧-ટે.સ્પૂન તેલ, બારીક સમારેલી મેથી અને બધીજ બાકી રહેલ સામગ્રી (મસાલા) અંદર નાખી અને સારી રીતે મિક્સ કરી અને તેમાં જરૂરી પાણી ઉંમેરી અને પૂરીના લોટ જેવો મસળી ને લોટ બાંધવો. લોટને ગૂંથી લીધા બાદ લોટને ૧/૨  કલાક માટે ઢાંકી ને રાખી દેવો. (લોટ ફૂલી જશે અને સેટ થઇ જશે)


ત્યારબાદ, લોટને ફરી મસળી ને લોટના લીંબુના આકાર જેવડા નાના લુઆ/ગોળા પાડવા.

એક કડાઈમાં તેલ નાખી અને ગરમ કરવું. ત્યારબાદ એક લુઆ / ગોળાને લઇને હાથમાં થોડું તેલ લગાડી અને પાટલી પર પણ તેલ લગાડી અને તેને વણવું, આ સિવાય અન્ય રીત છે, પાટલી પર પ્લાસ્ટિક પાથરી અને તેની પર તેલ લગાડી અને એક ગોળો તેની ઉપર મૂકી અને તે પૂરી જેવા આકારમાં નાની પૂરી અથવા ૨-૩ ઈંચ ની પૂરી જેવડું વણવું અને ગરમ તેલમાં તે  નાખી અને ઢેબરું તળવું. તળતી સમયે ઝારાની મદદથી કડાઈમાં તેને થોડું દાબવું અને માથે ગરમ તેલ રેડવું જેથી ઢેબરું સારી રીતે ફૂલશે. બંને સાઈડમાં બ્રાઉન થાય તેમ તેણે તળવું. અને બ્રાઉન થઇ ગયા બાદ એક પ્લેટ પર પેપર નેપકીન પાથરી અને તેની પર મૂકવા.  આવીજ રીતે ધીરે ધીરે બધાજ ઢેબરા તળી લેવા. એક સાથે ૨-૪ ઢેબરા એક સાથે તળી શકાઈ. આંમ બધાજ ઢેબરા તળી અને પ્લેટમાં રાખી દેવા.

બીજી રીત :

કડાઈમાં ઢેબરા તળવા ના હોઈ તો લોઢી /તાવીમાં શેકી શકાય. જે થેપલા જેવા આકારમાં મોટા પતલા વણવા અને ત્યારબાદ તાવીમાં  બને બાજુ બ્રાઉન થાય તેમ શેકવા અને તૈયાર થઇ ગયા બાદ પ્લેટમાં રાખી દેવા.


ઢેબરા અથાણા ની સાથે કે ચટણી સાથે ખાઈ શકાય.  થેપલા જેવા ઢેબરા ને બટેટા વટાણા ના શાક સાથે પણ ખાઈ શકાય છે.

ઢેબરાને ફ્રીઝમાં રાખીને ૪-૫ દિવસ ઉપયોગમાં લઇ શકાય છે. ફ્રીઝમાં રાખેલ ઢેબરાને બહાર કાઢી ગરમ કરીને ખાઈ શકાય છે. શિયાળામાં બાજરો લાંબો સમય ખરાબ થાતો ના હોઈ ઉપયોગમાં લઇ શકાય છે.

નોંધ : જો તમે પસંદ કરો તો આદુ – લસણ અને લીલા મરચાની પેસ્ટ બનાવી અને તે પણ મસાલા સાથે ઉપયોગમાં લઇ શકાય છે. જેનો સ્વાદ પણ અનેરો આવે છે.

 

બ્લોગ લીંક :http://das.desais.net

મગની દાળના (મીની) સમોસા …

મગની દાળના (મીની) સમોસા …

સામાન્ય સમોસા તો મોટા હોય, ૧-૨ સમોસા તે ખાઈ શકાય. પરંતુ આજે આપણે મગની દાળનાં નાના સમોસા બનાવીશું.

મગની દાળના નાના સમોસા, સામાન્ય સમોસા કરતાં સાઈઝમાં અડધા જ હોય છે. કારણકે તેમાં બટેટાની જગ્યાએ સેકેલી દાળ નો ઉપયોગ કરવામાં આવે છે. અને આ સમોસા ૧૦ – ૧૨ દિવસ સુધી ઉપયોગમાં લઇ શકાય છે. ચા ની સાથે સવારે કે સાંજે નાસ્તામાં પણ લઇ શકાય છે. આ સિવાય દિવાળી જેવાં તેહવારમાં પણ બનાવી શકાય. અથવા ઘરમાં પાર્ટી હોય તો મેહમાન માટે બનાવાય.

સામગ્રી:

સમોસાનું પળ બનાવવા માટેની સામગ્રી:

૨૫૦ ગ્રામ મેંદો (૧-૧/૪ કપ )

૬૦ ગ્રામ ઘી (૧/૪ કપ ) (હંમેશા સમોસાનું પળ બનાવવા ઘી-તેલ લોટના માપના ૧/૪ ભાગનું જ લેવું. )

૧/૨ નાની ચમચી મીઠું. (સ્વાદ અનુસાર)

સમોસામાં ભરવાનું પૂરણ બનાવવા માટેની સામગ્રી:

૧૦૦ ગ્રામ મગની દાળ (ફોતરા વાળી ૧/૨ કપ)

૨ ટેબલ સ્પૂન તેલ (ટે.સ્પૂન )

૧ ચૂટકી (ચપટીક) હિંગ

૧/૪ નાની ચમચી જીરૂ

૧ નાની ચમચી ધાણા નો પાઉડર

૧ ચમચો વરિયાળી નો પાઉડર

૨ નંગ લીલા મરચા

૧” ઈંચ નો ટૂકડો આદુ

૧/૪ નાની ચમચી લાલ મરચા નો પાઉડર (મરચાનો પાઉડર સ્વાદ અનુસાર લઇ શકાય)

૧/૪ નાની ચમચી ગરમ મસાલો (થોડો ઓછો પણ લઇ શકાય)

૧/૪ નાની ચમચી આમચૂર પાઉડર ( થોડો ઓછો પણ ચાલે )

૧/૨ નાની ચમચી મીઠું (સ્વાદાનુસાર)

સમોસા તળવા માટે જરૂરી- તેલ

રીત:

મેંદા ને ચારણીમા ચાળી અને એક વાસણમાં રાખવો.

ત્યારબાદ, તેમાં ઘી અને મીઠું ઉમેરવું અને નવસેકા (હુંફાળું) પાણી ની મદદેથી લોટ બાંધવો. સમોસાના પળ નો લોટ (કણક) હંમેશા કડક બાંધવો. (ખાસ ધ્યાન રહે ઢીલો નહિ બાંધવો)

લોટ ને સેટ થવાં માટે ૧/૨ કલાક માટે ઢાંકી ને રાખવો. સમોસા બનાવવા માટેનો લોટ તૈયાર થઇ ગયો.

સમોસામાં ભરવાં માટેનું પૂરણ બનાવવાની રીત:

મગની દાળ ફોતરાવાળી સમોસાના પૂરણ માટે ઉપયોગમાં લેવાય તો સારૂ. મગની દાળ સાફ કરી અને ધોઈ ૨ કલાક સુધી પાણીમાં પલાળી રાખવી. અને જો ફોતરાવાળી દાળ હોય તો તેના ફોતરા પાણીમાં કાઢી નાખવા અને દાળ ચારણીમાં કાઢી અને થોડો સમય માટે બહાર રાખવી. જેથી તેમાંથી બધું પાણી નિતરી (નીકળી) જાય.

પલાળેલી દાળમાં વધારાનું બીજું પાણી ઉમેર્યા વિના, તેમાં લીલા મરચાં, આદુ નાંખી અને તેને મિક્ષરમાં (મિક્સીમા)બારીક પીસી લેવી.

એક કડાઈમાં તેલ લઇ અને ગરમ કરવું અને તેમાં હિંગ, જીરૂ નાંખીને સાંતળવું. તે  શેકાઈ જાય કે તરત તેમાં ધાણાનો પાઉડર, વરિયાળી પાઉડર, અને પીસેલી દાળ નાખવી. દાળને ચમચાથી હલાવતાં રેહવી અને શેકવી. ત્યારબાદ, તેમાં લાલ્માંર્ચાનો પાઉડર, આમચૂર પાઉડર અને મીઠું પણ નાખવું. દાળનો બ્રાઉન કલર આવે અને દાળ સૂકી (કોરી) થઇ ન જાય ત્યાં સુધી સેકવી. આમ, શેકાઈ જાય એટલે ગેસ બંધ કરી દેવો. જે સમોસામાં ભરવાં માટેનું પૂર્ણ તયાર થઈ જશે.

સમોસા બનાવા માટે:

સમોસાનો જે લોટ બાંધેલ છે તેના લીંબુ જેવડી સાઈઝના ગોળા (લુઆ-ગોરણા)

બનાવવા-પાડવા. અને વેલણથી – ૪” ઈંચ પહોળી થાય તેવી પૂરી વણવી (બનાવવી). પૂરી પાતળી વણવી. જે પૂરી બંને તેને ચપ્પુની મદદથી બરોબર વચ્ચેથી બે સરખા ભાગ કરવા.

ત્યારબાદ, એક ભાગ હાથમાં લઇ અને તેના બંને છેડા કોન (શંકુ આકાર) આકાર થાય તેમ ભેગા કરવા અને પાણીની મદદથી ચોંટાડવા. આ કોનમાં ૧ થી ૧-૧/૨ ચમચી પૂરણ ભરવું. અને ઉપરનો ભાગ કવરની જેમ બંધ કરી ઢાંકી દઇ અને તેને પણ પાણી થી ચોંટાડવો. (પાણી લગાડી હાથથી થોડું પ્રેસ કરવાથી (દાબવાથી) ટે ચોંટી જશે.) સમોસાનો આકાર બરોબર એક સરખો લાગવો જોઈએ ટે ખાસ ધ્યાનમાં રહે. આમ, ધીરે ધીરે બધાજ સમોસા ભરી લેવા.

ત્યારબાદ, તેને તળવા માટે એક કડાઈમાં તેલ ગરમ કરવા માટે ગેસ ઉપર મૂકવું. ગરમ તેલમાં ૧૦-૧૨ (કડાઈની સાઈઝને / માપને ધ્યાનમાં રાખી ઓછા -વધારે લેવા) સમોસા એકી સાથે તળવા માટે મૂકવા. સમોસા મધ્યમ (ધીમા) તાપે તળવા. સમોસા બ્રાઉન કલરમાં થાય એટલે બહાર કાઢી અને એક પ્લેટમાં કિચન નેપકીન (પેપર) પાથરી તેની ઉપર મૂકવા.

આમ, ધીમે ધીમે બધાં જ સમોસા તળી લેવા અને પ્લેટ ઉપર મૂકવા. બસ, તમારા દાળના સમોસા તૈયાર થઇ ગયા.

સમોસા લીલી કોથમીરની ચટણી તેમજ મીઠી ચટણી સાથે ખાવાના ઉપયોગમાં લઇ શકાય. વધેલા સમોસાને એક એર ટાઈટ વાસણમાં ભરીને બંધ કરી રાખવાથી ૧૦-૧૫ દિવસ સુધી ઉપયોગમાં તે લઇ શકાય છે.

જો તમોને પસંદ હોય તો કાજુ -કિસમિસ પણ નાખીને બનાવી શકાય. તેમજ મસાલામાં પણ ફેરફાર-વધ-ઘટ કરી શકો છો.

સુજાવ :

(૧) દાળ ભીની રેહશે તો સમોસા બે (૨) દિવસથી વધુ રેહશે નહિ.

(૨) પૂરણ થોડું ખટ – મીઠું બનવવું હોય તો ૧ ટે.સ્પૂન ખાંડ પૂરણમાં નાંખવી

બ્લોગ લીંક: http://das.desais.net

વેજ. સ્પ્રીંગ રોલ …

વેજ. સ્પ્રીંગ રોલ (વેજીટેબલ સ્પ્રીંગ રોલ) …

 

 

સવારના નાસ્તામાં અથવા સાંજના હળવા નાસ્તામાં વેજ. સ્પ્રીંગ કેમ ના બનાવીએ ? બાળકોને પણ સ્પ્રીંગ રોલ વધુ પસંદ આવે છે. તો ચાલો આજે આપણે સ્પ્રીંગ રોલ બનાવીશું…

સામગ્રી :

સ્પ્રીંગ રોલ માટે નું પળ / રેપર બનાવવા …

૧૦૦ ગ્રામ મેંદો (૧-કપ)

સ્પ્રીંગ રોલમાં બરવા માટે ના મસાલામાટે ..

સામગ્રી :

૨૦૦ ગ્રામ કોબીચ (૧-કપ બારીક સમારવી)
૧૦૦ ગ્રામ પનીર (૧/૨ – કપ બારીક છીણી લેવું)
૧ નંગ લીલું મરચું (લાંબી સડી માં સમારવું)
૧ નંગ આદુ (મ૧/૨ ઈંચ લંબાઈ નો – જીણું સમારી લેવું )
૧/૪ નાની ચમચી કાળા મરીનો પાઉડર
૧/૪ નાની ચમચી લાલ મરચાનો પાઉડર ( જો તમને તિખાસ પસંદ હોય તો )
૧/૪ નાની ચમચી આજીનો મોટો
૧ નાની ચમચી સોયા સોસ
મીઠું સ્વાદાનુસાર
તેલ જરૂરી સ્પ્રીંગ રોલ તળવા માટે ..

રીત :

એક વાસણમાં મેંદાને ચાળી લેવો. અને પાણી તેમાં ઉમેરી અને ગંઠા કે ગોળી ના રહે તેમ તેનું ધોણ પાતળું બનાવવું. (૧ કપ મેંદા માટે ૧-૧/૨ કપ થી થોડું ઓછું પાણી લેવું) ધોણ બની ગયા બાદ, તેને ઢાંકીને ૧ કલાક માટે અલગ રાખી દેવું. જેથી મેંદો ફૂલી જશે.
જો ઉપરોક્ત મેંદાના ધોણનો તૂરત ઉપયોગ કરવામાં આવશે તો સ્પ્રીંગ રોલનું સ્ટફિંગ જ્યારે તેમાં ભરવામાં આવશે ત્યારે તે રેપર/પડ ને તૂટી/ફાટી જવાની શક્યતા વધુ રહે છે., તેથી તે ના બને તે માટે ૧ કલાક માટે ઢાંકી ને અલગ રાખવું.

હવે સ્પ્રીંગ રોલમાં ભરવા માટેનું સ્ટફિંગ/ પૂરણ તૈયાર કરીએ..

એક કડાઈમાં ૧ ટે. સ્પૂન તેલ નાખી ગરમ કરવું. લીલું મરચું, આડું, સમારેલી કોબીચ અને પાણી તેમાં નાખવું. ૧ મીનીટ માટે તેને પાકવા દેવું, ત્યારબાદ તેમાં કાળા મરીનો પાઉડર, લાલ મરચાનો પાઉડર, આજીનો મોટો, સોયા સોસ અને મીઠું ઉમેરવું. અને બધાને ખૂબજ સારી રીતે મિક્સ કરવું. બસ રોલમાં ભરવા માટેનું પૂરણ / સ્ટફિંગ તૈયાર છે. (ખાસ ધ્યાન રહે કે સ્ત્ફ્નીગની કોબી ૧ મીનીટ થી વધુ પાકવા દેવી નહિ, નહિ તો તેમાંથી પાણી છોત્વા મળશે અને તે રોલ બનવામાં મુશ્કેલી કરશે.)

સ્પ્રીંગ રોલ માટે નું પડ હવે બનાવીએ ..

નોન સ્ટિક તાવી ગરમ કરવા મૂકવી, તવી પર થોડું તેલ નાખી અને પેપર નેપકીન થી તેની પૂરી સરફેસ ઉપર તેલ પસારી દેવું. ત્વિની સપાટી ચિકની એક વખત કરી દેવી, ત્યારબાદ, મેંદાનું ધોણ લઈને તેને ચમચાની મદદ દ્વારા થોડું મિક્સ ફરી કરી અને એક ચમચો તવી ઉપર રેડવો અને પૂડલા કે ઢોસા બનવિએ તેમ તેને પાતળું પાથરવું. ત્યારબાદ, તેનો કલર ચેન્જ થશે એટલ તેની કિનારીમાંથી તે છૂટીને કિનારી ઉપર થશે એટલે તેને બને હાથની મદદ વડે ઊંચકીને એક પ્લેટમાં થોડું સપાટી ઉપર તેલ લગાડી અને તેની ઉપર ગોઠવવું. બસ, સ્પ્રીંગ રોલનું પડ તૈયાર છે. જ્યારે જ્યારે નવું પડ બનાવો ત્યારે સૌ પ્રથમ નોન સ્ટિક ઉપર તેલ વાળો પેપર નેપકીનથી લૂછી અને સપાટી ક્લીયર કરવી અને ત્યારબાદ જ પડ માટે ધોણ પાથરવું. અને પડ ઉખાડી ગયા બાદ પ્લેટ પર રાખીએ ત્યારે પણ પ્લેટ પર તેલ પહેલા લગાડવું અને ત્યારબાદ જ પડ ગોઠવવું.

 

સ્ટફિંગ ભરવું ..

પ્લેટ પર રાખેલ પડ પર બે ચમચા સ્ટફિંગ / પૂરણ મૂકી અને તેને લંબાઈમાં વ્યવસ્થિત ગોઠવવું. બંને સઈદની કિનારીથી થોડું દૂર અને ત્યારબાદ, બંને સાઈડની કિનારીને ઉપાડીને વાળી દેવી અને આગળના ભાગની કિનારી ઉપાડી અને તેને રોલ કરવું.આમે ધીરે ધીરે પૂરો રોલ પેક કરી દેવું. આજ રીતે, બધાજ રોલ બનાવી લેવા. તૈયાર રોલ ને પ્લેટમાં રાખતા જવા. આવી જ રીતે બધા જ રોલ બનાવતા જવા અને પ્લેટમાં રાખવા. (એક કપ મેંદામાં લગભગ ૮ રોલ બનાવી શકાય)

વેજ. સ્પ્રીંગ રોલ ને બે રીતે તૈયાર કરી તૈયાર કરી શકાય ..

૧.] સેલો ફ્રાઈ

૨.] ડીપ ફ્રાઈ

 

સૌ પ્રથમ આપણે થોડા રોલ સેલો ફ્રાઈ કરીએ.. સેલો ફ્રાઈ કરવા માટે નોન સ્ટિક કડાઈમાં એક ચમચો તેલ નાખી અને તેને ગરમ કરી અને તેમાં ૨ નંગ સ્પ્રીંગ રોલ કે તેથી વધુ જો રહી શકે તો તે મૂકી અને તેને આછી બ્રાઉન સપાટી થાય તેમ ફ્રાઈ કરવા અને ફેરવતા જવું અને ચારે બાજુથી આચા બ્રાઉન કલરમાં ફ્રાઈ કરવા. અને તૈયાર થઇ ગયા બાદ એક કાચની પ્લેટમાં તેને અલગથી રાખી દેવા. આમ થોડા સેલો ફ્રાઈ પસંદ હોઈ તો કરવા.

૨.] ડીપ ફ્રાઈ કરવા માટે .. તેજ કડાઈમાં થોડું વધુ તેલ ઉમેરી અને ગરમ થાય એટલે આચા તાપથી ગરમ કરવું, તેલમાં ૨ કે તેથી વધુ સમાઈ શકાય તેટલા સ્પ્રીંગ રોલ મૂકવા અને તેને તળવા. સ્પ્રીંગ રોલ ની સપાટી આછી બ્રાઉન કલરની થાય ત્યાં સુધી ફેરવતા જવું અને તળવા, અને સપાટી આછી બ્રાઉન થાય એટલે તેને એક પ્લેટમાં અલગથી કાઢીને મૂકી દેવા. આજ રીતે બાકીના બધાજ સ્પ્રીંગ રોલ તળી લેવા અને પ્લેટમાં રાખી દેવા.

 

બસ, સ્પ્રીંગ રોલ તૈયાર છે. જે લીળી  કોથમીરની ચટણી અથવા લાલ ચટણી અને ટામેટા ના સોસ/ કેચપ સાથે પીરસવા અને ખાવ અને મહેમાનો ને પીરસો…

સુજાવ :

સ્પ્રીંગ રોલમાં ભરવાનું પૂરણ માટે તમને પસંદ કોઈપણ શાક –ભાજી ની પસંદગી તમે કરી શકો છો અને તેને જીણા સમારી અને આછા/ થોડા પકવીને ઉપયોગમાં લઇ શકાય છે. આ ઉપરાંત બાફેલા નૂડલ્સ નો પણ ઉપયોગ કરી શકાય છે. જે પણ સ્વાદમાં સારા લાગશે. કાંદા અને લસણ જો પસંદ હોય તો તેનો પણ ઉપયોગ કરી શક્યા છે. આ ઉપરાંત મસાલામાં પણ તમારા સ્વાદ અનુસાર વધ ઘટ કરી શકાય છે.

બ્લોગ લીંક: htpp://das.desais.net