વાંગીચા કોશીંબીર … (સલાડ) …

વાંગીચા કોશીંબીર … (સલાડ) …

મહારાષ્ટ્રમાં વિવિધ પ્રકારના કોશીંબીરનો ઉપયોગ કરાય છે. કોશીંબીર એ સલાડનો જ એક પ્રકાર છે. પરંતુ દિવસ કે રાત્રીના ભોજનમાં કોશીંબીરનું વૈવિધ્ય એક અલગ સ્થાન ધરાવે છે. વાંગી એટ્લે કે રીંગણ અને સામાન્ય રીતે એ રીંગણનું શાક બનાવવામાં આવે છે. પરંતુ અહીં રીંગણનો ઉપયોગ કોશીંબીર – સલાડ  તરીકે કરવામાં આવ્યો છે. આશા છે કે આપ સર્વે વાંચક મિત્રોને જરૂર પસંદ આવશે. મિત્રો બ્લોગ પોસ્ટ પર આપના પ્રતિભાવ સદા અમોને આવકાર્ય અને પ્રેરણાદાયક રહેશે … તો જરૂર કોમેન્ટ્સ બોક્ષ પર આપના પ્રતિભાવ  મૂકશો…

૪ વ્યક્તિઓ માટે ..
બનાવવાનો સમય ૧ કલાક ..
વધુ સમય ફક્ત વાંગીને રોસ્ટ કરવામાં જાય છે.
સામગ્રી :
૨  મોટા રીંગણાં
૧ મોટું ટામેટું બારીક સમારીને
૧ કપ કોથમરી બારીક સમારીને
૧ કાંદો બારીક સમારીને
૧ લીલું મરચું બારીક સમારીને
૧ લસણની કળી
નોંધ: (લસણની કળી નાની હોય તો ૩ અને મોટી હોય તો ૧ લેવી)
મીઠું સ્વાદ અનુસાર
૧ ચમચો શીંગદાણા અધકચરા વાટેલાં
લીંબુનો રસ ૨ ચમચી
૧ ચમચો એક્સ્ટ્રા વર્જીન ઓલીવ ઓઇલ
૧।૨ કપ લીલા સોયાબીન દાણા
રીત :
૧) સૌ પ્રથમ મોટા રીંગણાંને ધોઈ કોરા કરવા.
૨) રીંગણાંમાં વચ્ચેથી કટ એ રીતે કરવા કે આખા રીંગણાં ન કપાઈ જાય માત્ર એક કાપ મૂકવો.
૩) કટ કરેલ રીંગણાંની અંદરની બાજુ મીઠું છાંટવું.
૪) મીઠું છાંટયા બાદ તેમાં ૧/૨ બારીક કરેલ લીલું મરચું મૂકવું.
૫) મરચાં બાદ સોયાબીનના દાણા, અને લસણની કળી અંદર મૂકી રીંગણાંને બંધ કરી દેવું
૬) રીંગણાંની બહારની બાજુ ઓલીવ ઓઇલ લગાવવું.
૭) રીંગણાંને એલ્યુમિનિયમ ફોઈલ બેગમાં મૂકી દેવું.
૮) એલ્યુમિનિયમ ફોઈલ બેગની અંદર ૨ ચમચી ઓલીવ ઓઇલ નાખવું.
૯) બેગને ૪૧૦ ડિગ્રી પર ઓવનમાં બેક કરવું.
નોંધ: રોસ્ટ થઈ રહેલ રીંગણનો, લીલા મસાલાનો અને સોયાબીનનો એક અલગ પ્રકારનો ફ્લેવર જળવાય તે માટે એલ્યુમિનિયમ ફોઈલનો ઉપયોગ કરાય છે.
૧૦) રીંગણ રોસ્ટ થઈ જાય ત્યારે ઓવન બંધ કરીને ફોઈલ બેગ બહાર કાઢી લેવી.
૧૧) ફોઈલ બેગમાંથી રીંગણાંને તેના રસ સાથે બહાર કાઢી લેવું.
૧૨) રીંગણાંની ઉપરની છાલ કાઢી લેવી અને વચ્ચે રહેલા પલ્પને બારીક સમારી લેવો.
૧૩) બારીક કરેલ કાંદા, ટામેટાં, બાકી રહેલ લીલું મરચું, બાકી રહેલ ઓલીવ ઓઇલ, કોથમરી, શીંગદાણાના અધકચરા ટુકડાને મિક્સ કરવા.
૧૪) સ્વાદ અનુસાર મીઠું અને લીંબુનો રસ નાખવો અને ફરી મિક્સ કરી લેવું.
૧૫) કાંદા ટામેટાંના સલાડમાં રીંગણાંનો પલ્પ નાખવો અને મિક્સ કરવું.
૧૬) રીંગણાંના પલ્પને જે રીતે બારીક સમારીને લઈ શકાય છે તે જ રીતે પેસ્ટ પણ બનાવી શકાય છે, રીંગણની પેસ્ટ બનાવીને ટામેટાં કાંદાની કચુંબર ઉપરથી નાખી મિક્સ કરીને પીરસવું.



નોંધ: જે સ્વાદ સમારેલમાં આવે છે તે સ્વાદ પેસ્ટમાં નથી આવતો. આ સલાડ પીતાબ્રેડ, ફ્રેંચ બ્રેડ અથવા સોલટીન ક્રેકર્સ સાથે ઉપયોગમાં લેવાય છે. અહીં આપેલ ચિત્ર વેબ જગત ને આધારિત છે… જે અલગ અલગ પ્રકારના વાંગીચા -રીંગણ ના સલાડ દર્શાવે છે. જે બદલ વેબ જગતના  આભારી છીએ.

સાભાર :પૂર્વી મલકાણ મોદી  (યુ એસ એ)
રસ પરિમલમાંથી
Blog Link: http://das.desais.net

નાળિયેરની ચટણી…

નાળિયેરની ચટણી …

ઢોસા, ઈડલી, વડા સાથે નારિયેળની ચટણી ના હોય તો ખાવામાં કશુક ખૂટે છે તેમ લાગે.

 

સામગ્રી:

 

૧/૨ – અડધું સુકું નાળિયેર

૧/૨ – કપ લીલી કોથમીર (મોટા પીસમાં ચૂંટી લેવી)

૨ – નંગ લીલા મરચાં

૧ – નંગ નાનું લીંબુ

૩/૪ – નાની ચમચી મીઠું (સ્વાદાનુસાર)

વઘાર માટેની સામગ્રી:

૨ – નાની ચમચી તેલ

૧ – નાની ચમચી રાઈ

૧- ચૂટકી (Pinch) લાલ મરચાનો પાઉડર (જો તમને પસંદ હોય તો)

 

રીત:

 

નાળીયેર ને સાફ કરી અને તેના નાના નાના ટૂકડા કરી લેવા.

ત્યારબાદ, નારિયેલ, લીળી કોથમીર, લીલા મરચાં, લીંબુ નો રસ, મીઠું સ્વાદાનુસાર અને બે (૨) ચમચા પાણી મીક્ષર (મિક્સી)મા નાંખી અને તેને બારીક પીસવું.

ચટણી જેટલી (ઘટ) જાડી રાખવી હોય તે ધ્યાનમાં રાખી તે મુજબ પાણી ઉમેરી ને પીસવી. અને પીસાઈ ગયાબાદ તેને એક વાટકી અથવા વાસણમાં કાઢી લેવી.

ત્યારબાદ, નાની વાટકી કે વઘારીયામાં તેલ નાંખી અને ગરમ કરવા મૂકવું. તેલમાં રાઈ નાંખી નાંખવી અને તેને સાંતળવી, તે શેકાઈ ગયા બાદ, તૂરત જ ગેસ બંધ કરી દેવો અને તેમાં લાલ મરચાનો પાઉડર એક ચપટીક નાંખવો અને તે તેલ ચટણીમાં છાંટી દેવું.

ચટણી બસ તૈયાર થઇ ગઈ છે, જેને ખાવાના ઉપોયોગમાં લઇ શકાય છે.

આજ ચટણીને વધુ સ્વાદિષ્ટ બનાવી હોય તો, નારેયેળના ટૂકડા, લીલા મરચાં અને સેકેલ ચણાની દાળને મિક્સરમાં પિસ્તા પેહલાં થોડા તેલમાં સેકી લેવામાં આવે અને ત્યારબાદ, પીસવામાં આવે તો તે વધુ સ્વાદિષ્ટ બનશે.

ચણાની દાળ ની બદલે, દાળિયા કે કાબુલી બાફેલા ચણાનો પણ ઉપયોગ કરી શકાય છે.

 

બ્લોગ લીંક: htpp://das.desais.net

સિંગદાણાની ચટણી …

સિંગદાણાની ચટણી…

સિંગદાણાની ચટણી ઈડલી, ઢોસા ની  સાથે ખાઈ શકાય. જે બહુજ સ્વાદિષ્ટ બને છે. ફ્રીઝમાં રાખવાથી ૩-૪ દિવસ સુધી ખાવાના ઉપયોગમાં લઇ શકાય છે.

સામગ્રી:

૧ કપ સિંગદાણા ને શેકીને તેના ફોતરા કાઢી લેવા

૨-૩ નંગ લીલા મરચાં

૧/૨ નાની ચમચી રાઈ

૧ થી ૨ ચૂટકી (Pinch) /ચપટીક-લાલ મરચાનો પાઉડર

૧ લીંબુનો રસ

૨ નાની ચમચી રિફાઈન્ડ ખાવાનું તેલ

મીઠું સ્વાદાનુસાર

રીત:

સિંગદાણા એક કપ જે માપથી લીધા હોય તેજ કપમાં તેટલું પાણી લેવુ અને તેમાં મીઠું, લીલા મરચાં નાંખીને અને મિક્સીમાં બારીક પીસી લેવું. જો તમને વધુ ઘટ લાગે તો થોડું પાણી ઉમેરવું. ચટણી તૈયાર થયે એક વાસણમાં કાઢી લેવી. ત્યારબાદ, તેમાં લીંબુનો રસ નાંખી અને મિક્સ કરવો.

ચટણી નો વઘાર :

ગેસ ઉપર એક નાની કડાઈ ગરમ કરવા મૂકવી અને તેમાં તેલ મૂકવું. ત્યારબાદ, તેમાં રાઈ નાંખવી, રાઈ શેકાય ગઈ તેમ લાગે કે તરત ગેસ બંધ કરી દેવો અને તેમાં બે ચૂટકી (Pinch) લાલ મરચાનો પાઉડર નાંખવો અને તે વઘારને ચટણીમાં નાંખી અને ૧-૨ વખત હલાવી મિક્સ કરી દેવો.

બસ, (મગફળીના દાણા )સિંગદાણાની ચટણી તૈયાર, જે ખાવાના ઉપયોગમાં લઇ શકાય છે.


આજ ચટણીમાં ૪-૫ કળી લસણ, ૪-૫ નંગ કાળી મરી અને થોડા અજમાનાં પાન પિસતાં પેહેલાં નાંખી અને પછી પીસવાથી તેનો સ્વાદ અલગ જ આવશે.

૧ કપ એટલે ૧૦૦ ગ્રામ., તમે ૫૦ ગ્રામ સિંગદાણા લઇ શકો છો.

સિંગદાણા ને સેકી અને તેના ફોતરા ઉતારી લેવા અને પછી જ તેને ઉપયોગમાં લેવા.

બ્લોગ લીંક: http://das.desais.net

ફૂદીનાની ચટણી …

ફૂદીનાની ચટણી  …

ફૂદીનાની ચટણી ખાસ કરીને  સમોસા, કચોરી, ભજીયા વગેરે સાથે ખાવાના ઉપયોગમાં લેવામાં આવે  છે. તે ખાવામાં ખૂબજ સ્વાદિષ્ટ હોય છે.

સામગ્રી :

૧ થી ૧-૧/૨ કપ ફૂદીનો (ફૂદીનાના ચૂંટેલા પાન)

૨ -૩ નંગ લીલા મરચાં

૧/૨ કપ દહીં અથવા ૧ નંગ કાચી કેરીના ટૂકડા

૧/૨ નાની ચમચી સેકેલું જીરૂ

૩/૪ નાની ચમચી મીઠું (સ્વાદાનુસાર)

રીત:

ફૂદીનાને સાફ કરી ધોઈને ચૂંટી લેવો. મરચાને પણ ધોઈને તેની ઉપરની ડાળખી તોડી નાંખવી.


ફૂદીનાના પાન, લીલાં મરચાં, મીઠું, સેકેલું જીરૂ અને દહીં બેગા કરી અને મિક્સીમાં બારીક પીસી લેવું.

જો તમને કાચી કેરીની ખટાશ સાથે આ ચટણી બનાવવા માંગતા હોય તો, ૧ કાચી કેરીની છાલ ઉતારી તેના ટૂકડા કરી અને ફૂદીનાના પાન, લીલાં મરચાં, મીઠું, સેકેલું જીરા સાથે મિક્સીમાં પીસી લેવું. અને ચટણીને એક વાટકીમાં કાથી લેવી.

આ ચટણી સમોસા, કચોરી વગેરે સાથે ખાવાના ઉપયોગમાં લઇ શકાય છે તે ઉપરાંત સવારે તેમજ રાત્રે જમવાના ઉપયોગમાં પણ લઇ શકાય છે.

ચટણીને ફ્રીઝમાં રાખવાથી એક અઠવાડિયાં સુધી ઉપયોગમાં લઇ શકાય છે.

બ્લોગ લીંક: http://das.desais.net

લીલી કોથમીર ની ચટણી …

લીલી કોથમીર ની ચટણી …

 

આ ચટણી મોટેભાગે સમોસા, કચોરી, ભજીયા, દહીંવડા વગેરે સાથે ખાવાના ઉપયોગમાં લેવામાં આવતી હોય છે.

સામગ્રી:

૧૦૦ ગ્રામ લીલી કોથમીર ( લીલા ધાણા )

૩-૪ નંગ લીલા મરચાં

૧ નાની ચમચી આમચૂર પાઉડર અથવા ૧ -નંગ લીંબુનો રસ

૧ નાની ચમચી ગરમ મસાલો અથવા સિંગદાણા

મીઠું સ્વાદ અનુસાર

રીત:

લીલી કોથમીર અને મરચાંને ધોઈને સાફ કરી લેવા અને તેને મોટા કટકામાં કાપી (સમારી) લેવા.

ત્યારબાદ, કોથમીર, લીલા મરચાં, ગરમ મસાલો. આમચૂર પાઉડર અથવા લીંબુનો રસ, મીઠું વગેરે ભેગું કરી મીક્ષરમાં (મિકસીમાં)નાંખી અને બારીક પીસવું. પાણી તેમાં જરૂરિયાત મુજબનું જ ઉમેરવું. ( ચટણી તમારે કેટલી પાતળી કે ઘટ? રાખવી છે તે ધ્યાનમાં લઈને )

કોથમીરની ચટણી તૈયાર થઇ ગયાબાદ, ફ્રીઝમાં રાખી શકાય છે અને તેનો ઉપયોગ એક અઠવાડિયાં સુધી થઇ શકે.

ગરમ મસાલાની જગ્યાએ થોડા સિંગદાણા અને થોડું સંચળ (કાળું નમક) નાખીને બનાવવાથી તેનો સ્વાદ વધુ અલગ આવશે.

આ ચટણીમાં બાફેલા બટેટાનાં કટકા/ટૂકડા નાંખીને ખાવાથી બટેટા ખૂબજ સ્વાદિષ્ટ લાગશે. (લખનૌમાં આવા બટેટા લીલી કોથમીરની ચટણીમાં નાંખીને બઝારમાં વેંહચાતા હોય છે.)

આ ચટણીમાં થોડું દહીં ઉમેરવાથી પણ તેનો અલગ સ્વાદ આવશે.

આ ચટણીમાં કાચી કેરીના ટૂકડા, ડુંગળીના ટૂકડા, લાલ અથવા લીલું આખું મરચું, લીલી કોથમીર વગેરેને એક્શાથે ભેગા કરીને ખાંડણીમાં પીસીને સ્વાદાનુસાર મીઠું નાંખીને ઉનાળામાં આ ચટણી પણ બનાવી શકાય. જે ખૂબજ સ્વાદિષ્ટ ?બનશે.

મોટે ભાગે કોઈપણ ચટણી આપણે મિક્સીમાં જ હવે બનાવતા થયા છે, પરંતુ જો તેને પથ્થરની કૂંડીમાં અથવા પથ્થર પર પીસીને બનાવવામાં આવે તો તેનો સ્વાદ સાવ અલગ જ આવશે. જે મિક્સી કરતાં વધુ સ્વાદિષ્ટ બનશે.

બ્લોગ લીંક: http://das.desais.net


સૂકા મસાલાની ચટણી…

સૂકા (ખડા) મસાલાની ચટણી ….

મૂળ રસોઈ બનાવતા પેહલાં તેમાં ઉપયોગમાં લેવામાં આવતા અનેક પ્રકારના મસાલા અને તેની સાથે ઉપયોગમાં લેવામાં આવતી ચટણી, જે અનેક પ્રકારની બનતી હોય છે; જેની જાણકારી મેળવી લેવી જરૂરી છે.

તો ચાલો, આપણે સૂકા મસાલાની ચટણી બનાવીશું….

સામગ્રી:

૨ -ટે. સ્પૂન- આખા ધાણા

૧/૨ – ટે.સ્પૂન- જીરૂ

૧ – ચમચી કાળા મરી

૬-૭ નંગ લવિંગ

૪ – નંગ મોટી એલચી (ફોતરા ખોલી ને દાણા કાઢી લેવા)

૪-૫ નંગ લાલ મરચા સૂકા

૨ – ચૂટકી હિંગ (Pinch)

૧ ચમચી (નાની) મીઠું (સ્વાદાનુસાર)

૧ – નંગ લીંબુ

૧ – ટે.સ્પૂન રીફાઈન્ડ તેલ

રીત:

બધા જ મસાલા સાફ કરીને તૈયાર રાખવા.

એક કડાઈ / લોઢી ગેસ પર ગરમ કરવા મૂકવી. તેમાં, આખા ધાણા અને જીરૂ સેકવા માટે મૂકવું. બ્રાઉન કલર આવે ત્યાં સુધી સેકવું.

સેકાઈ ગયા બાદ તેને ઠંડા કરવા મૂકવું અને તે ઠંડા થઇ જાય બાદ, બાકીના બધાં મસાલા તેની સાથે ભેગા કરવા. આમ બધાં જ મસાલા એકી સાથે મિક્સરમાં નાખવા અને તેમાં જરૂર પૂરતું પાણી ઉમેરવું કે તે મસાલા પીસાતા તેની પેસ્ટ થાય. એટલે કે જે ચટણી બને તે થોડી ભીની પણ ઘટ રહે. (જાડી)

પેસ્ટ બની ગયા બાદ, એક કડાઈમાં તેલ ગરમ કરવા મૂકવું, તેલ ગરમ થાય એટલે તેમાં મસાલા ની પેસ્ટ નાખી અને ૨-૩ મીનીટ સુધી તેમાં મસાલા સાંતળવા / મસાલા શેકવા. શેકાઈ ગયા બાદ, ચટણીને એક વાટકીમાં કે વાસણમાં કાઢી લેવી અને તેના ઉપર લીંબુ નો રસ નીચાવવો અને હલાવી મિક્સ કરવી.

બસ, ચટણી તૈયાર થઈ ગઈ. ……



આ ચટણી ભજીયા,કચોરી, સમોસા, વડા તેમજ સ્ટફ પરોઠા સાથે ખાવાના ઉપયોગમાં લઇ શકાય. ચટણી ને ફિઝ્માં રાખવાથી ૧૫ દિવસ સુધી ઉપયોગમાં લઇ શકાય.

નોંધ: ઘરમાં કદાચ લીંબુ ના હોય તો ૧ – નાની ચમચી આમચૂર પાઉડર પણ નાખી શકાય.

બ્લોગ લીંક: htpp://das.desais.net

ચના મસાલાનો પાઉડર…

ચના મસાલાનો પાઉડર …

આજે જોઈશું ચના મસાલામાં વપરાતો મસાલો કઈ રીતે બનાવવો કે જે ને કારણે આપણા ચના (ચણા) મસાલા એકદમ સ્વાદિષ્ટ બને.

છોલે બનાવતી સમયે આ મસાલાનો ઉપયોગ કરવાથી બજારમાં મળતા મસાલા ના ઉપયોગ કરતાં છોલે એકદમ સ્વાદિષ્ટ બનશે.

સામગ્રી :

૧ – ટે.સ્પૂન  અનાર દાણા

૩ -ટે.સ્પૂન  ધાણા (આખા)

૧ -ટે.સ્પૂન  જીરૂ

૨ -નાની ચમચી મોટી એલચીના દાણા

૨ -નાની ચમચી કાળા મરી દાણા

૧/૨ નાની ચમચી લવિંગ

૩-૪ ટૂકડા તજ

૮ -નંગ આખા લાલ મરચા

૧ -નાની ચમચી સંચળ (કાળું મીઠું)

બનાવવાની રીત:

એક કડાઈ લ્યો અને તેને ગેસ પર ગરમ કરવા મૂકો. અને તેમાં દાડમના બી, આખા ધાણા, અને જીરું નાખી ને સામાન્ય બ્રાઉન કલર થાય તેમ સેકવું. અને સેકાઈ ગ્યા બાદ, તેને ઠંડા કરવા રાખવા.

ઠંડા થઇ ગયા બાદ, બાકીના બધાં જ મસાલા એકસાથે ભેગા કરી દેવા અને તેને બારીક પાઉડર થાય તેમ પીસી લેવા. (મીક્ષરમાં)

પાઉડર તૈયાર થઈ ગયા બાદ, તેને એક એર ટાઈટ (હવા ચુસ્ત) વાસણમાં તે પાઉડર ભરી લેવો. જ્યારે ચના કે છોલે બનાવો ત્યારે તેને ઉપયોગમાં લેવો.

૧૦૦ ગ્રામ ચના (ચણા) કે છોલે બનાવવા માટે ૨ -નાની ચમચી ચના મસાલા પાઉડર નાખી શકાય.

બ્લોગ લીંક: htpp://das.desais.net